Presidenti i Sri Lankës, Gotabaya Rajapaksa, ka konfirmuar dorëheqjen e tij, thotë zyra e kryeministrit, pasi protestuesit sulmuan rezidencat zyrtare të të dy liderëve. Demonstruesit vazhdojnë të pushtojnë pallatin presidencial dhe rezidencën kryeministrore, dhe kanë refuzuar të largohen derisa liderët të largohen.
Kryetari i Parlamentit tha të shtunën se presidenti do të jepte dorëheqjen më 13 korrik. Por shumë protestues ishin shumë skeptikë ndaj njoftimit. Të hënën, zyra e kryeministrit Ranil Wickremesinghe tha në një deklaratë se ishte informuar zyrtarisht nga zoti Rajapaksa se ai do të largohej të mërkurën. Megjithatë, nuk ka pasur asnjë fjalë të drejtpërdrejtë nga zoti Rajapaksa.
Sipas Kushtetutës së Sri Lankës, dorëheqja e tij mund të pranohet vetëm zyrtarisht kur ai jep dorëheqjen me letër drejtuar kryetarit të Parlamentit – gjë që ende nuk ka ndodhur. Wickremesinghe kishte thënë gjithashtu më herët se do të tërhiqej nga pozicioni i tij.
Vendndodhja e zotit Rajapaksa është aktualisht e pazbuluar, por burime ushtarake i kanë thënë “BBC’-së se ai ndodhet në një anije të marinës në ujërat e Sri Lankës.
Mijëra njerëz dolën në kryeqytet të shtunën, duke kërkuar dorëheqjen e presidentit pas muajsh protestash. Rajapaksa është fajësuar për keqmenaxhimin ekonomik të vendit, i cili ka shkaktuar mungesë ushqimi, karburanti dhe ilaçesh për muaj të tërë. Protestuesit brenda pallateve kanë refuzuar të lëvizin, derisa të dy liderët të largohen nga detyra.
“Lufta jonë nuk ka mbaruar”, tha kreu i protestës studentore Lahiru Weerasekara, cituar nga “AFP”. “Ne nuk do të heqim dorë nga kjo luftë, derisa presidenti Rajapaksa të largohet në të vërtetë”, tha ai.
“Dy ditët e ardhshme do të jenë kohë jashtëzakonisht të pasigurta për të parë se çfarë do të ndodhë politikisht”, tha për “Reuters” analisti politik dhe avokati i të drejtave të njeriut Bhavani Fonseka, duke shtuar se do të ishte interesante të shihej nëse të dy udhëheqësit “në të vërtetë japin dorëheqjen”.
Udhëheqësit politikë mbajtën takime të mëtejshme për të diskutuar një tranzicion të qetë të pushtetit të dielën. Kryetari i parlamentit të Sri Lankës i tha programit të BBC World Service Newshour se një qeveri e re e koalicionit ndërpartiak duhet të formohet brenda një jave, pas dorëheqjes së presidentit zyrtarisht.
Mahinda Yapa Abeywardena, një anëtar i partisë qeverisëse të presidentit, gjithashtu fajësoi kryesisht Covid-19 për problemet ekonomike të vendit. “Pandemia Covid ka krijuar kërdi në vend ekonomikisht, kështu që na u desh të shpenzonim të gjitha paratë tona për vaksinat”, tha ai.
Burimi i lajmit: BBC. Përshtatur nga Tirana Today
