Situata në të cilën ndodhet Jose Mourinho te Manchester United është ndër më të vështirat në karrierën e tij, pasi rrezikon shkarkimin. Humbja në ndeshjen e fundit përballë Tottenham në shtëpi me rezultatin e thellë 0-3, ka bërë që të lëkundet edhe më shumë pozicioni i tij tek United.
Dy humbje në tre ndeshjet e para cilësohet si një dështim për Manchester United, pasi kishin kaluar 26 vite nga një start kaq negativ. Disa e shohin si pozitiv këtë fakt, pasi herën e fundit që ndodhi në pankinë ishte Alex Ferguson dhe në fund të sezonit ata u shpallën kampionë, dhe tifozët shpresojnë që kjo histori të përsëritet.
Por Jose Mourinho që pa filluar kampionati ishte cilësuar nga mediat angleze si trajneri favorit për tu shkarkuar i pari në këtë sezon. Madje dhe kompanitë e basteve e kishin vlerësuar me koeficient të ulët, ndërsa tani po hedhin hipoteza për të ardhmen e portugezit pas shkarkimit.
Sipas kompanisë së basteve “Betfair” që sponsorizon Seria A, strategu portugez do të shkarkohet nga United dhe do të bashkohet me Interin, teksa koeficienti që kjo gjë të ndodh shkon në 2.75. Mourinho ka kaluar dy sezone nën drejtimin e Interit, 2008-2010, e drejtuar drejt tripletës së famshme në vitin 2010.
