Ministrja e Shtetit për Marrëdhëniet me Parlamentin, Elisa Spiropali, përpara delegatëve socialistë në Kongresin e PS, u shpreh se 61% e qytetarëve shqiptarë janë pro legalizimit të kanabisit. Ajo tha ndër të tjera se Shqipëria e ka fituar luftën me kanabisin, dhe se vendi ynë nuk është më në hartën e vendeve problematike. Sipas Spiropalit, falë legalizimit të kanabisit do të hapen vende të reja pune, dhe duke luftuar kriminalizimin e këtij fenomeni.
“Luftën me bimët narkotike e kemi fituar. Shqipëria ka dalë nga harta e vendeve problematike. 61% shqiptarë janë dakord që vendi të kontrolloje kultivimin e kanabisit për qëllime mjekësore. Një qasje e tillë do të dekurajojë ilegalitetin dhe kriminalitetin. Ne do e dëgjojmë zërin e tyre, dhe do të hapim një front të ri pune dhe duke luftuar kriminalizimin e këtij fenomeni”, tha Spiropali.
Ministrja u ndal edhe tek “Ballkani i Hapur”, nismë të cilën e konsideron në interes të Shqipërisë.
“Nisma e “Ballkanit të Hapur” është në interes thelbësor të Shqipërisë dhe të gjithë shqiptarëve në rajon. I jep më shumë frymëmarrje lëvizjes së mallrave. Qarkullimi i mallrave në këtë treg është fragmentarizuar”, u shpreh ajo.
