Kroacia ka siguruar një biletë për në gjysmëfinale pas një ndeshje të “çmendur” përballë Rusisë të luajtur 120’ minuta dhe pas penalltive janë ata fituesit. Një kualifikim historik për kroatët që kanë një grup mjaft të mirë lojtarësh dhe do të kërkojnë të shkruajnë historinë duke kërkuar finalen.
Ishin vendasit që kaluan të parët në avantazh me anë të Cheryshev, i cili në minutën e 31’ shënon një gol spektakolar. Një goditje nga jashtë zonë, në dukje pa pretendime por që befason mbrojtjen dhe portier Subasic duke përfunduar në rrjetë.
Festa zgjat vetëm 8 minuta, pasi një shpërthimi Madzukic në të majtë sjell golin e barazimit të shënuar nga Kramaric. Lojtari i Juventusit është një ndër pikat kyçe të ekipit kroat, pasi sakrifikohet në të gjithë fushën.
Në pjesën e dytë të dy ekipet nuk kanë krijuar shumë, ishin kroatët që dominuan më lojën dhe krijuan disa raste, por nuk finalizuan si duhet. Perisic kishte një shans të artë në minutën e 60’, por topi prek shtyllën dhe kalon të gjithë pasqyrën e portës duke mos kaluar vijën fatale.
Pasi koha e rregullt është mbyllur në barazim 1-1, Kroacia ka realizuar golin e fitores në pjesën e parë të shtesës, me Vida që ka shënuar me kokë në minutën e 101-të pas një goditje nga këndi të Modric. Rusia, gjithsesi, nuk është dorëzuar dhe është hedhur në sulm për golin e barazimit, të cilin e ka gjetur në minutën e 115-të, kur Mario Fernandes ka mposhtur portierin Subasic me një goditje të saktë me kokë.
Barazia ka zgjatur deri në minutat e fundit të fundit të shtesës dhe dy ekipet i janë drejtuar pikës së bardhë, prej ku kanë dalë të fituar kroatët me rezultatin 5-3. Smolov dhe Fernandes kanë gabuar për rusët, Kovacic për kroatët.
Në gjysmëfinale, që do të luhet 11 korrikun e ardhshëm në orën 20:00, kroatët do të përballen me Anglinë.
