Këshilli i Lartë i Prokurorisë është mbledhur ditën e sotme për të diskutuar mbi ngritjen e SPAK-ut. Mësohet se në rend dite është vetëm një pikë e vetme, miratimi i një projekt-vendimi. Bëhet fjalë për projekt-vendimin “Për miratimin e listës me renditjen e kandidatëve për prokurorë në SPAK”.
Relatori i Komisionit të Posaçëm për SPAK, Sandër Beci ka paraqitur raportin në lidhje me dosjet e përfunduara të kandidatëve dhe jo me ato që janë ende në hetim. Kandidati Gëzim Cena u vendos që të përjashtohej nga gara, pasi sipas komisionit, ai nuk plotësonte kushtet.
“25 kandidatë plotësonin kushtet ligjore dhe mund të vazhdonin procesin. Gëzim Cena nuk plotëson kushtet për të vijuar garën. Ai nuk ka qenë asnjëherë prokuror i Republikës së Shqipërisë. Sipas ligjit, magjistrati duhet të ketë ushtruar detyrën si prokuror për jo më pak se 10 vjet. Ndaj dhe Cena nuk mund të plotësojë kriteret”, deklaroi Beci.
Komisioni i Posaçëm ka miratuar një metodologji vlerësimi me pikëzim për secilin kandidat në përputhjen me “Rregulloren për ngritjen e SPAK” e miratuar në seancën plenare të KLP. Procesi është mbikëqyrur përgjatë ecurisë së tij nga misionet ndërkombëtare EURALIUS dhe OPDAT.
