Prokuroria e Posaçme Anti-Korrupsion, (SPAK) ka dërguar për gjykim ish-kryeprokurorin Adriatik Llalla.
Ndërkohë, Gjykaka e Posaçme anti-Korrupsion, (GJKKO) i ka hequr sekuestron pasurive të Llallës.
Ai akuzohet për deklarim të pasaktë të pasurive në tre raste, sipas një hetimit të çelur në prokurorinë e Durrësit, menjëherë sapo organet e vettingut dorëzuan rezultatet e tyre, pikërisht në momentin ku ish prokurori i përgjithshëm u dorëhoq nga e drejta për të vazhduar udhëtimin në drejtësi.
“Fshehja ose deklarimi i rremë i pasurive, interesave privatë të personave të zgjedhur dhe nëpunësve publik ose i çdo personi tjetër që ka detyrimin ligjor për deklarim, dënohet me gjobë ose me burgim deri në tre vjet”, thuhet në ligj.
Kjo solli gjithashtu ndërprerjen e procesit të vettingut dhe daljen nga sistemi të Llallës për 15 vitet e ardhshme, por ndërkohë deklarimi i pasaktë referuar deklaratave të firmosura prej tij në ILDPKI është kthyer në një çështje penale.
Sipas Kodit Penal akuza ndaj Llallës është ajo e nenit 257/a paragrafi dytë me një marzh dënimi gjobë deri në tre vite burg.
Adriatik Llalla u largua nga detyra në vitin 2017, dhe vendin e tij e zuri Arta Marku.
