Deputeti i Partisë Demokratike Edmond Spaho nëpërmjet një statusi në “Facebook” është përpjekur të përgënjeshtrojë një deklaratë të bërë nga vetë ai paraditen e sotme në qytetin e Elbasanit.
Spaho, është shprehur se LSI dhe PDIU do jenë partitë e opozitës pas 25 Qershorit, duke lënë të nënkuptojë se PS-PD do të jenë parti në bashkëqeverisje.
Citim nga mediet
Jemi pranë fitores së 25 Qershorit. Ky aktivitet zhvillohet që të marrim hapa urgjente për arritjen e suksesit në 25 Qershor. Ju jemi mirënjohës për kontributin e dhënë gjatë protestës së 3 muajve të fundit, pasi PD ka meritën për krijimin e kushteve për zgjedhje të lira e të ndershme. PD ndërkombëtarizoi çështjen e kanabizimit të Shqipërisë për t’i dhënë fund ketij fenomeni. Në tre muaj i rrëzuam gjysmën e qeverisë Edi Ramës. Larguan Sajmir Tahirin, simbolin e kanabizimit etj. Ndërpremë për herë të parë koalicionet parazgjedhore. LSI & PDIU do jenë partitë e opozitës pas 25 Qershorit”,- tha deputeti.
Kjo deklaratë e nënkryetarit të PD-së e cila është parë si një parapërgatitje e opinionit publik për bashkëpunim pas zgjedhor e dy partive të mëdha dhe është përcjellë me shpejtësi në pjesën më të madhe të medieve në vend.
I kontaktuar nga gazetarët e “Tirana Today” lidhur me vërtetësinë e këtij lajmi, Spaho është shprehur se ky ka qenë lajm i rremë dhe se do të mbajë një qëndrim personal ne rrjetin e tij social “Facebook”.
Statusi 1
“ Fake news. Po qarkullon nje lajm sipas te cilit ne aktivin e PD ne Elbasan une paskam thene se LSI dhe PDIU do jene partite e vetme opozitare pas zgjedhjeve te 25 Qershorit. Teresisht e pa vertete. Ajo qe kam thene eshte qe LSI dhe PDIU do jene parti ne opozite dhe PD do dale parti e pare pas zgjedhjeve dhe do qeverise me aleatet e saj”tha Spaho
Në vijim më prononcimin telefonik, demokrati ka publikuar një status ku është munduar sërish të përgënjeshtrojë lajmin por përmbajtja dhe konteksti i shkruar është identik me deklaratën “Fake” të pasqyruar nga mediet e vendit para disa orësh.
Mirëpo, nga ana tjetër është dashur ndërhyrja e zyrës së shtypit të selisë blu, për të devijuar kontekstin e përsëritur të nënkryetarit Spaho.
Statusi 2
“Fake news. Po qarkullon nje lajm sipas te cilit ne aktivin e PD ne Elbasan une paskam thene se LSI dhe PDIU do jene partite e vetme opozitare pas zgjedhjeve te 25 Qershorit. Teresisht e pa vertete. Ajo qe kam thene eshte qe LSI dhe PDIU do jene parti ne opozite dhe PD do fitoje dhe do te qeverise me aleatet e saj. Ndaj te gjithe mbeshtetesit tane te dhunuar e mashtruar keto vite nga partite e pazarit te vjeter jane te lire tashme te rikthehen ne shtepine e tyre Partine Demokratike, partine qe do te fitoje zgjedhjet me koalicionin e saj opozitar dhe bashkimin per Republiken e Re. Natyrisht e para qe do dale ne opozite do jete PS dhe Edi Rama”,tha Spaho.
Mbetet për tu parë nëse “lapsusi” i përsëritur i deputetit Spaho është parapërgatitje për një koalicion të mundshëm PD-PS apo një gabim i përsëritur.
