Bjellorusia zhvillon ditën e sotme zgjedhjet presidenciale. Në garë është presidenti i tanishëm, Aleksander Lukashenko dhe një ish-mësuese anglishteje, e cila u bë pjesë e garës pasi autoritetet ia ndaluan pjesëmarrjen bashkëshortit të saj.
Lukashenko pritet t’i fitojë këto zgjedhje dhe mandatin e gjashtë me radhë në pushtet, por mund të përballet me një valë të re protestash. Kjo për shkak të pakënaqësisë rreth menaxhimit të situatës së pandemisë, gjendjes ekonomike dhe të drejtat e njeriut.
Lukashenko ndodhet në pushtet në Bjellorusi që nga viti 1994. Përballë tij në garë është Svetlana Tikhanouskaya, e cila u bë pjesë e garës pasi bashkëshorti i saj, që synonte të merrte pjesë në zgjedhje u burgos.
Fushata e saj është karakterizuar nga disa prej tubimeve më të mëdha që nga rënia e ish-Bashkimit Sovjetik në vitin 1991. Grupet për të drejtat e njeriut kanë thënë se mbi 1,300 persona janë arrestuar nga autoritetet si pjesë e një fushate shtypëse kundër opozitës.
