Komisoni i Posaçëm i Apelit ka shtyrë për në datën 18 shtator seancën ndaj Donika Prelës, ish-drejtuese e ish-Prokurorisë së Krimeve të Rënda. Ajo nuk është paraqitur gjatë seancës së sotme, për arsye shëndetësore.
Në seancën e fundit që u zhvillua në KPA, komisioneri Florian Ballhysa kërkoi shkarkimin e prokurores Donika Prela, me pretendimin se ajo nuk e justifikon blerjen e një apartamenti banimi në Durrës, dhe nuk ka asnjë burim të ligjshëm për një llogari bankare.
Ndërsa Prela kërkoi largimin e dy gjyqtareve; Natasha Mulaj dhe Ina Rama nga shqyrtimi i vendimit të Komisionit të Pavarur të Kualifikimit, pasi ka konflikt interesi.
Donika Prela u konfirmua në detyrë në muajin shkurt, nga Komisioni i Pavarur i Kualifikimit. Nga verifikimet e kryera, nuk kishte rezultuar asnjë parregullsi në deklarimin e pasurisë. Por, Komisioneri Publik e ankimoi vendimin në shkallën e dytë të Vettingut, KPA.
