Sot në 20:15 në Stadiumin ‘Generali Česká pojišťovna Arena’
Kombëtarja shqiptare e futbollit do të zhvillojë ditën e sotme dhe ndeshjen e dytë dhe të fundit miqësore të planifikuar për muajin qershor, atë ndaj Republikës Çeke në transfertë.
Çekia vjen në këtë përballje si në testin e fundit për në fushatën e tyre të Euro 2020-ës ku do të luajnë në një grup me Anglinë, Kroacinë dhe Skocinë.
Kombëtarja jonë numëron 2 fitore në histori ndaj këtij kundërshtari që na ka mundur 3 herë të tjera.
Për Shqipërinë një rezultat pozitiv rrit moralin e grupit para ndeshjeve të shtatorit që do të jenë të rëndësisë maksimale për ne.
Trajneri Reja u shpreh për ndeshjen e sotme se vetëm në fund do ta vendosë formacionin në varësi të formës së lojtarëve:
“Sigurisht që do ketë ndryshime dhe do shikoj deri në moment të fundit, qoftë dhe formën e Seferit dhe Cikalleshit dhe do tëmarr në konsideratë deri nesër në mëngjes, kur unë të bëj analizat e mia dhe do të vendos se cilët lojtarë do të hedh në sulm. Edhe në mesfushë mbase do të kem ndonjë ndryshim, por do të flas me lojtarët se si ndihen, nëse një pjesë e tyre ndihen mirë, sigurisht që do t’i marr parasysh dhe pastaj do të marr vendim. Patjetër që edhe në pjesën e dytë të takimit do të ketë ndryshime në formacion dhe do të përpiqem të aktivizoj të gjithë lojtarët patjetër, por luajmë kundër një skuadre të fortë si Çekia, kështu që kam bindjen se duhet të luajmë me lojtarët që janë më shumë në formë dhe që kanë më shumë eksperiencë.”
Shqipëria me vetëm 2 gola të pësuar në 4 ndeshjet e fundit nga ku ka dalë me rrjetën e paprekur në dy ndeshjet e fundit pritet t’ia bëjë të vështirë jetën çekëve përpara nisjes për në Glasgow.
Formacioni i mundshëm i kombëtares sonë mendohet se mund të jetë:
Selmani; Kumbulla, Djimsiti, Ismajli; Laci, Abrashi, Ramadani, Bare, Lenjani; Manaj, Cikalleshi
Ndërsa Rep. Çeke:
Vaclik; Coufal, Zima, Celustka, Boril; Soucek, Kral; Jankto, Darida, Hlozek; Schick
