Sociologu Gëzim Tushe thotë se shqiptarët vuajnë ende mentalitetin e trashëguar nga sistemi totalitar, se përgjegjësia për individin nga lindja në vdekje është e shtetit. Ai theksoi në një intervistë për “Euronews Albania” se sipas një sondazhi, 70 për qind e njerëzve stresohen në vendin e punës. Në vendin e punës ka bullizëm, ngacmim seksual, presione, autoritarizëm, tha më tej ai, sidomos në administratën publike që i bën njerëzit të shpërqendruar duke mos pasur rezultatin e duhur.
“Jetuam 50 vjet në një shtet që na mësoi keq, sipas të cilët përgjegjësia për njeriun deri në vdekje është e shtetit. Ky mentalitet ndihet akoma. Secili duhet të kuptojë përgjegjësitë që ka për të përballuar gjërat mbi trupin e vetë.
Ka një mentalitet sipas të cilit shohim faktorët socialë si faktorë të stresit. Por ka shumë faktorë të tjerë. Një sondazh i fundit tregon se 70 për qind e njerëzve stresohen në vendin e punës.
Ne s’i kushtojmë shumë rëndësi kësaj. Në postin e punës ka bullizëm, ngacmim seksual, presione, autoritarizëm, sidomos në administratën publike që i bën njerëzit të shpërqendruar, duke mos pasur rezultatin e duhur.
Janë disa faktorë individualë dhe socialë që na kanë renditur si gjithmonë të parët në Ballkan për keq”, tha sociologu.
