Sot është prezantuar projekti për ‘Mbrojtjen civile’, ku i pranishëm në prezantim ishte edhe kryeministri Edi Rama. Mes të tjerash, kreu i qeverisë u shpreh se mbrojtja civile ka kaluar në një tjetër nivel. Rama theksoi se shteti ka pasur reagim të menjëhershëm për emergjencat, duke deklaruar se hartimi i një ligji të ri për mbrojten nga emergjencat ishte një domosdoshmëri. Ai paralajmëroi sanksione dhe masa të forta, jo vetëm për institucionet shtetërore, por edhe për privatin.
“Ka qenë një tranzicion jo i lehtë i emergjencave civile. Sfida mbetet e përditshmja, jo momenti kur emergjenca shfaqet. Fokusi jonë do të jetë parandalimi.
Territori, gjatë tranzicionit të rrëmujshëm e ka dobësuar shumë kapacitetin natyral mbrojtës të strukturës së vendit tonë.
Do vendosim sanksione të qarta për çdo institucion shtetëror apo privat.
Nuk mund t’i hapim gropën vetes në përditshmëri, dhe kur të vijë furtuna t’i kërkojmë shtetit të na nxjerrë nga gropa.
Nuk mund të prishim tubacionin e ujit për të vendosur ca palma për një lokal dasmash, dhe pastaj të ankohemi pse shteti na prishi dasmën”, deklaroi Rama.
