Sllovakia do të shesë ose dhurojë 160 mijë vaksina ruse kundër koronavirusit, Sputnik V, para datës së tyre të skandencës. Vendimi është marrë nga kabineti qeveritar më 23 qershor.
Në fillim të muajit mars, Sllovakia mori 200 mijë doza të Sputnik V, por një pjesë e madhe e popullsisë, refuzoi të injektohej me këtë vaksinë. Deri më tani, 14.214 janë regjistruar për të marrë dozën, teksa 8.004 persona janë vaksinuar, shkruan The Slovak Spectator.
“Duke pasur parasysh situatën e vazhdueshme serioze epidemiologjike dhe nevojën për bashkëpunim të ndërsjellë me vendet për të ngadalësuar përhapjen e Covid-19, ne propozojmë të dhurojmë një numër të caktuar të dozave të Sputnik V në vendet e Ballkanit Perëndimor si pjesë e ndihmës materiale”, thuhet në dokumentin e miratuar nga qeveria.
Vaksinat do të shiten në vendet që tregojnë një interes. Deri më tani, vetëm Argjentina ka ofruar të blejë disa doza.
