Aktori i mirënjohur Neritan Liçaj është një nga artistët më aktivë, sa i përket nismës për mbrojtjen nga shembja të Teatrit Kombëtar.
I ftuar në studion e Fax News, Liçaj e konsideron planin për zhvendosjen e materialeve nga teatri, si një provokim të radhës nga qeveria dhe Bashkia e Tiranës. Ai shprehet se nëse godina prishet atëherë kjo gjë do sillte fundin përfundimtar të kryeministrit Rama, duke rikonfirmuar kështu qëndrimin e artistëve se teatri nuk do të prishet.
“Ministrja e Kulturës mohon që të ketë një dokument për zhvendosjen e materialeve të Teatrit Kombëtar. Teatrit eksperimental i kanë kërkuar që të largohen. Kemi dëgjuar shumë në gjithë këto kohë, ne e dimë që nuk vijnë dot dhe e gjitha kjo bëhet për provokim. Ne do të jemi 24 orë në 24 aty, janë thjesht skuthlliqet e Lali Erit dhe Edi Ramës, i provuan të gjitha taktikat me ne dhe nuk ja dolën. Unë personalisht mezi pres që të përballemi, pasi ka ardhur koha që ne të masim forcën tonë. Teatri Kombëtar është kthyer në një betejë kombëtare, kjo është vija për të mbrojtur vendin”, tha Liçaj.
Më tej, ai e bën të qartë se ata nuk do bëjnë pushime, teksa thekson se vigjilenca në mbrojtje të godinës do të jetë maksimale.
“Ndjeshmëria ndaj Teatrit është shumë e madhe, ndejtën me ne gjithë natën dhe qytetarë që nuk kishin qenë kurrë më parë. Problemi më i madh është se ne kemi bërë aleancë shumë të fortë me intelektualë, dhe me grupe të tjera opozitare, do të ndizet një vullkan shumë i madh. Në nuk do të bëjmë pushime dhe ti lëmë teatrin sa halabakëve që duan që të pastrojnë paratë e drogës, unë e kam thënë dhe më parë që teatri do të jetë fundi i tyre”, u shpreh aktori.
Liçaj nuk la pa komentuar as zërat për përçarjen e artistëve, duke thënë se një pjesë e tyre janë korruptuar në mënyra të ndryshme nga segmente pranë qeverisë.
“Shumë prej artistëve u kërcënuan, dhe një pjesë e tyre edhe pse nuk mund ta them me siguri janë korruptuar. Po unë ua njoh zemrat shumicës prej tyre, dhe e di që përveç tre katër kokrrave asnjë prej artistëve nuk do që teatri të shembet”, deklaroi ai.
