Kushëriri i Annës, e cila u cilësua edhe si “skifterja” e karburanteve, është rrëfyer se i ka ardhur keq që ta linte atë vetëm, e ndaj kishte bashkëpunuar me të.
31- vjeçarja Anna Malaj, së bashku me kushëririn e saj, Emiljano Grëmbi, u paraqitën në Gjykatën e Fierit dy ditë më parë, dhe pranuan grabitjen e karburantit ne Levan. Në fund të seancës gjyqësore, trupi gjykues vendosi masën e “arrestit me burg”, me akuzën “Vjedhja me armë, e kryer në bashkëpunim”, e mbetur në tentativë.
Në gjykatë, Emiljano dëshmoi se i ka shkuar pas kushërirës së tij, pasi i kishte ardhur keq që ta linte vetëm. Sipas tij, ajo pinte alkool që të dehej, para se të grabisnin, pasi në këtë formë ishte me e çlirët për të vepruar.
“U detyrova të shkoja me të, sepse më erdhi keq ta lija vetëm. Ajo pinte alkool që të dehej para se të grabisnim, pasi kështu ishte më e çlirët për të vepruar. Pasi dehej, niseshim për të bërë grabitjet. Armën e kishte Anna, unë thjesht e kam përkrahur në nismën e saj”, mësohet të ketë thënë 22-vjeçari, raporton “Panorama”.
Ai ka mohuar që të kishte marrë diçka nga shuma e grabitur. Sipas tij, të gjithë këtë shumë e ka marrë kushërira e tij. Pasi i ka dëgjuar palët, trupi gjykues ka dhënë masën e vlerësimit “burg pa afat” për të dy autorët. Pas verifikimeve të kryera nga ana e policisë, rezultoi se arma e përdorur në krim nga ana e 31-vjeçares i përkiste babait të saj. Ky i fundit e kishte me leje, dhe e kishte fshehur në banesën e tij në Mallakastër.
