Ishte krijuar ideja se Skënderbeu ishte ekipi me financat më të shëndosha në kampionatin shqiptar, por e vërteta qenka se disa lojtarë kanë rroga të prapambetura. Është pikërisht një ndër emrat më të dashur të tifozëve korçarë, Sabien Lilaj, i cili do të përballet në gjyq me drejtuesit e klubit,për shkak të rrogës së papaguar të lojtarit për 1 vit të tërë.
Lilaj pas një pritje të gjatë i është drejtuar Dhomës së Zgjidhjes së Konflikteve dhe pretendon që të marrë 126 mijë euro, të cilat i detyrohet Skënderbeu, nga ana tjetër klubi shprehet se në të vërtetë futbollistit i detyrohet 97 mijë euro dhe jo aq sa kërkon ai.
Në një prononcimi për “Panorama Sport” para se të largohej për në Azerbajxhan Lilaj deklaroi: “Unë e kam mbyllur me Skënderbeun, pasi më ka skaduar kontrata dhe klubi më ka disa detyrime. Ndoshta presidenti ka pritur këtë vendim, pasi unë jam lojtar i lirë. I kam thënë presidentit që të më likuidojë financiarisht dhe ma ka shtyrë. Shpresoj të ndodhë shpejt, në të kundërt i çoj në gjyq.” Këtë situatë pritet që ta zgjidhë FSHF, pasi palët kanë pretendime të kundërta.
