Skënderbeu ka arritur të mposhtë Kamzën në përballjen e javës së 9, duke e mbyllur me fitore javën e parë. Momentalisht korçarët janë rikthyer në vendin e parë në klasifikim me 20 pikë, duke pritur përfundimin e ndeshjes mes Partizanit dhe Luftëtarit.
Ndeshja nisi mjaft mirë për korçarët, të cilëve iu deshën vetëm 12’ minuta për të shënuar golin e avantazhit. Vangjeli nisi me një top të gjatë sulmuesin Oto John dhe ky i fundit mposhti me lehtësi portierin e Kamzës.
Nga ana tjetër, skuadra e Klodian Duros reagoi menjëherë dhe vetëm pak minuta më vonë fitoi një 11-metërsh, të cilin Sebino Plaku e shpërdoroi, pasi dërgoi topin mbi kuadratin e portës së Teqjas.
Edhe në pjesën e dytë Kamza ishte më shumë kërkuese, por portieri i Skënderbeut ishte në ditën më të mirë dhe ndal çdo top që shkon drejt portës, duke i mohuar një gol thuajse të sigurt Plakut.
Në minutat shtesë, arbitri akordoi një goditje dënimi mbi vijën e zonës për Skënderbeun, të cilën e ekzekutoi mjeshtërisht Dejvi Bregu, dhe e dërgoi topin në trekëndëshin e portës së Avdulit, duke vulosur rezultatin 2-0.
Kjo fitore është mjaft e rëndësishme për korçarët, që përveçse ngjiten përkohësisht në krye të renditjes, shkojnë me moral të lartë edhe në transfertën e fundjavës në kryeqytet, ku do të përballen me Partizanin. Nga ana tjetër, Kamza do të duhet të ngushëllohet edhe njëherë me lojën e mirë dhe rastet e humbura, ndërsa pankina e trajnerin Klodian Duro është lëkundur seriozisht tashmë.
