Kampionati shqiptar nis aty ku përfundoi, Skënderbeu është sërish ai që komandon në një ndeshje delikate si ajo me Partizanin. Janë korçarët që arritën të marrin tre pikët e para në Superiore, pasi kjo ishte edhe ndeshja hapëse e këtij sezoni. Një ndeshje e luftuar nga të dy ekipet, por që në fund vendos Muzaka me një-11 metërsh të fituar nga Dejvi Bregu.
Rivaliteti i fortë u duk që në minutat e para, por pavarësisht ndryshimeve të shumta Skënderbeu dukej më dominues ndaj të kuqve dhe luan më rrjedhshëm. Duelet mes lojtarëve janë mjaft të ashpra dhe arbitri detyrohet të ndërpresë ndeshjen shumë shpesh. Orges Shehi qëndron në këmbë dhe udhëzon të tijtë në ndeshjen e parë si trajner.
Nga ana tjetër Partizani bën gjithçka mirë në repartin e mesfushës dhe mbrojtjes, ndërsa në sulm është më i ngadaltë dhe jo i qartë. Në minutën e 71’ pas një përplasje mes lojtarëve në fushën e lojës, situatën e marrin në dorë tifozët të cilët shkatërrojnë stadiumin dhe përplasen mes tyre. Fillimisht godasin me gurë nga larg, ndërsa më pas zbresin në fushë për tu përballur fizikisht. Loja ndërpritet për disa minuta, derisa situatën e merr nën kontroll policia e shtetit, e cila nuk ndodheshe në stadium pasi mbarëvajtjen e ndeshjes e kishte marrë një polici private.
Me rifillimin e lojës të dy trajnerët bëjnë ndryshime pasi kërkojnë të marrin fitoren. Dejvi Bregu bën një lëvizje mjaft të zgjuar në hyrje të zonës dhe i shpëton mbrojtjes, dhe del i vetëm përballë portierit Hoxha, ndërsa ky i fundit shkakton faull në zonë dhe penallti. Ekzekutimin e merr përsipër Muzakaj, i cili me një goditje fantastike e dërgon topin atje ku Hoxha nuk mund të bënte asgjë, në trekëndësh. Ky ishte goli i vetëm në këtë sfidë dhe Shehi, por edhe Skënderbeu e nisin aventurën e re me fitore.
