Futbolli në Shqipëri ka treguar që në disa përballje të veçanta mund të jetë mjaft i bukur dhe me shumë emocion. Kur përballen ekipet më të forta, gjithmonë pritet spektakël dhe gola, por nuk mund të mungojnë edhe episode të veçanta. Sot do të luhet superndeshja mes Skënderbeut dher Kukësit, ku korçarët kërkojnë ti mposhtin dhe të sigurojnë titullin kampion matematikisht, kërkojnë ta bëjnë pikërisht ndaj verilindorëve në shenjë hakmarrje. Nëse kthehemi në histori, më 20 maj të vitit 2017, në stadiumin “Zeqir Ymeri” luhej ndeshja ndërmjet Kukësit dhe Skënderbeut, po për titullin kampion.
Jemi pothuajse një vit larg asaj dite, datë që vështirë të harrohet nga të dyja palët edhe pse në këndvështrime të ndryshme. Kukësi i Safet Gjicit do të festonte titullin e parë në histori pas një fitoreje 2-0 ndaj korçarëve. Rezultati ishte i tillë, pasi nëse pyesim korçarët do të na tregojnë se si më 20 maj të vitit 2017, gjyqtari Enea Jorgji është shpallur njeriu më i padëshiruar në Korçë.
Kjo mund të jetë edhe ndeshja më e shëmtuar që mund të keni parë ndonjëherë në Superiore, ku arbitri të bëhet protagonist absolut. Ishte një arbitrim skandaloz nga elbasanasi që nga minuta e parë deri në vërshëllimën e fundit. Ishtë Mici viktima e parë e Jorgjit që në minutën e 11’, i cili u dërgua në tribunë pas një faulli ndaj Pejic. Ndërsa në fillim e së dytës ndodh katastrofa e madhe, ku Latifi masakrohet në zonë, por Jorgji vazhdon lojën. Aty nuk mbanin më nervat dhe Osmani del nga vetja e gjithë ekipi në fushë bashkë me stolin i sulen gjyqtarit. Salihi, modeli i një futbollisti të urtë dhe punëtor nuk ishte më i njëjti, del nga vetja shanë arbitrin dhe gris kartonin e kuq dhe çuditërisht nuk ndëshkohet.
Skënderbeu la fushën e lojës duke kontestuar vendimet e gjyqtarëve, por “dora magjike” i ktheu sërish në fushë. Pjesëmarrësit e asaj feste tregojnë se nuk e dinë se si Jorgji e gjykoi ndeshjen deri në fund, pasi nuk i kishte mbetur “asnjë pikë gjaku në trup”, aq i zbehtë ishte, por në fund, gjithçka harrohet…
