Ish-deputetja demokrate Albana Vokshi ka reaguar pas deklaratës së kryeministrit Edi Rama bërë ditën e sotme, teksa mohoi që administrata të jetë detyruar për të dhënë lekë për të prekurit nga tërmeti.
Përmes një postimi në “Facebook”, Vokshi e quan Ramën një mashtrues, ndërsa ka postuar një vendim, që sipas saj urdhëron mbajtjen e pjesshme të pagave të policëve në Shkodër.
Postimi i Vokshit:
Sa më e madhe fatkeqësia, aq më intensive dhe e pamëshirshme makineria e propagandës së Edi Ramës që përmes mashtrimit nuk kursen askënd as fëmijë, as persona me aftësi ndryshe, as gra e të moshuar, as policë apo profesionistë.
Sot, Kryeministri Rama mashtroi përsëri kur tha që nuk i kanë detyruar punonjësit të japin lekë nga rroga e tyre. Po postoj edhe një herë Urdhrin e paligjshëm 1933, dr 27.11.2019 që urdhëron mbajtjen e pjesshme të pagave të policëve në Shkodër.
Duke keqpërdorur qëllimshëm vendosjen antikushtetuese të gjendjes së jashtëzakonshme, interesi kryesor i Kryeministrit këto ditë është të hapë sheshe ndërtimi. Ndaj edhe s’u jep qytetarëve akt ekspertimin për shtëpitë e pallatet.
