Analisti Agim Baçi i mëshon fort faktit se duhen dënuar krimet e komunizmit dhe se asnjëherë nuk është kurrë vonë. Teksa një ditë më parë u përkujtua rrëzimi i bustit të diktatorit Enver Hoxha, Agim Baçi u shpreh në studion e “ABC Live” se nuk është kurrë vonë për të pasur një gjyq për të shkuarën.
Sipas tij, Shqipëria është vendi i vetëm ish-komunist që nuk ka as të penduar dhe as falës. Duke qëndruar në të njëjtën linjë, ai thekson se është me rëndësi që të dënohen krimet e komunizmit.
“Ne jemi ndoshta ndër të vetme vende ish komuniste që nuk kemi as të penduar, as falës. Nuk guxuam. Kjo është një pasojë që unë e quaj djallëzorja mbeti. Një shoqëri që nuk guxon të thotë të vërtetën për të shkuarën e vetë, rrezikon të gabojë sërish.
Jam i shqetësuar nëse fëmijëve nuk u tregojmë të vërtetën. Nuk mund të kemi moralin t’u themi të bëhen të mirë për këtë vend.
E shkuara jonë ka mbetur në errësirë. Ne nuk arritëm të kemi jo vetëm një gjyq për komunizmin. Trashëguam njeriun e ri por që mbarti atë ideologji edhe pas viteve ’90. Kam qenë gjithnjë mbështetës i idesë për të pasur një gjyq për të shkuarën. Nuk është kurrë vonë”, tha Baçi.
