Neymar pas debutimit në Europë me Barcelonën u kthye në një yll futbolli. Ai është një ndër futbollistët brazilianë më të mirë dhe mban statusin e futbollistit më të shtrenjtë. Neymar theu çdo rekord transferimi kur kaloi nga Barcelona te PSG për shumën e 222 milionë euros.
Edhe në Francë ai po bën paraqitje fantastike në kryeqytetin francez dhe klubet e mëdha evropiane janë të gatshme të bëjnë shpenzime kolosale për shërbimet e tij dhe një ndër to, është Real Madridi.
Paco de Gracia është një nga skautët e vjetër të Real Madridit dhe në një prononcim për ‘Sky Sport’ ka treguar një prapaskenë që lidhej me transferimin e Neymar që dikur ishte në provë te Real Madridi. Megjithëse bëhet fjalë për moshën 13-14 vjeçare, Neymar shihej që atë kohë se mund të bëhej një futbollist i madh në të ardhmen pasi cilësitë e tij në fushë krijonin shumë besim.
“Ai erdhi në Madrid kur ishte 13-14 vjeç dhe nga aeroporti mbërriti menjëherë në qendrën sportive për t’u stërvitur me pjesën tjetër të skuadrës dhe po e tregonte veten superior. Kështu e kaluam me pjesën e atyre që ishin 2 vite më të mëdhenj por edhe aty tregoi se ishte më i fortë se të gjithë.
Pse mungoi firma? Gjithçka u bë mirë dhe menaxheri e bëri detyrën e tij por në fund ndërhyri familja. Mund të them se nuk kërkuan një shumë të madhe, pasi me 60 mijë euro do të nënshkruante kontratën, megjithatë u anulua gjithçka dhe u kthye mbrapsht”, u shpreh de Gracia.
