Federata Shqiptare e Futbollit në një reagim të bërë së fundmi është distancuar nga ngjarjet e ndodhura së fundmi, ku persona anonimë kanë kërcënuar inspektorët e UEFA-s, për hetimin që po i bëhet ekipit të Skënderbeut. Ata kanë shprehur gatishmërinë për të bashkëpunuar me autoritetin më të lartë të futbollit, për të zbardhur këtë ngjarje dhe për të nxjerrë para ligjit personat përgjegjës. Po ashtu FSHF shprehet se është e angazhuar maksimalisht në betejën kundër ndeshjeve të fiksuara.
Deklarata e plotë e FSHF-së:
Federata Shqiptare e Futbollit distancohet plotësisht nga ngjarja më e fundit ku persona anonimë kanë cënuar integritetin moral dhe kanë shantazhuar inspektorët e UEFA-s në punën e tyre investigative.
FSHF inkurajon autoritetet policore për të zbardhur deri në fund origjinën e këtyre telefonatave intimiduese dhe të dënueshme. Si në çdo moment, edhe këtë radhë ajo është e gatshme të bashkëpunojë me UEFA-n dhe me autoritetet përkatëse për zbardhjen sa më shpejtë të ngjarjes e cila duhet të vërë përpara përgjegjësisë ligjore autorët.
FSHF shprehet e angazhuar maksimalisht në betejën kundër ndeshjeve të fiksuara. Federata e futbollit mbetet në solidaritet të plotë me UEFA-n në misionin e përbashkët kundër fenomenit të trukimit, duke ofruar çdo potencial të sajin bashkëpunues.Të tillë mekanizma kërcënues kanë vetëm një fund të sigurtë, atë të ndëshkimit nga forca e ligjit.
