Në skandalin e pronave që shpërtheu në Lezhë është i përfshirë edhe futbollisti i Vllaznisë, Renato Malota. Është arrestuar kryetari i bashkisë dhe nën hetim janë edhe 23 zyrtarë të tjerë, përfshirë këtu edhe qendërmbrojtësin e shkodranëve.
Malota iu bashkua Vllaznisë ne merkaton e janarit, ndërsa tani i duhet të përballet me një telash mjaft të madh të nxjerrë nga policia. Ai rrezikon të përfundojë pas hekurave të burgut. Malota dyshohet se është i përfshirë në skemën e abuzimit me tjetërsimin e pronave në ‘Ranën e Hedhun’.
Futbollisti i Vllaznisë, Renato Malota, ka reaguar për “BalkanWeb” lidhur me skandalin e pronave në Bashkinë Lezhë ku përmendej emri i tij si një nga shumë përfituesit.
Malota u shpreh: “Unë nuk kam asnjë lidhje me atë që flitet, është një gabim. E gjitha ka ndodhur se unë kam biznesin tim aty pranë, është një ngatërresë. Unë nuk njoh asnjërin dhe nuk kam asnjë lidhje me kryetarin e bashkisë të arrestuar. Ajo është një pronë e imja të cilën e kam trashëguar nga gjyshi dhe vetëm se ndodhet aty pranë përmendet emri im. Unë jam një futbollist dhe nuk kam asnjë lidhje me shtetin.”
Ndërsa sa i takon lajmit për urdhër arrest Malota përgjigjet: “Unë nuk e kuptoj, jam në stërvitje me ekipin, nuk ka asgjë të vërtetë.”
