Kryebashkiaku i Lezhës, Pjerin Ndreu, e ka cilësuar si një sjellje aspak dinjitoze për një zyrtar që merr lëndë narkotike, duke iu referuar rastit të kryebashkiakut në Bulqizë. Ndreu tha në një intervistë për Report Tv, se për aq sa ka parë nga ato pamje të ofruara në media, nuk është i sigurtë nëse bëhet fjalë për Lefter Allën. Duke qëndruar në të njëjtën linjë, ai ia faturon fajin kryebashkiakut, dhe se koston nuk duhet ta marrë PS-ja.
“Nuk kam koment, jam teleshikues si të gjithë ju. Kam parë në TV, nuk jam në gjendje të përcaktoj nëse personi në fjalë ishte filani. Janë ekspertiza që i bëhet videos dhe nxjerr faktin. Jemi përballë një akuze, nuk është etike të jap opinion. Nuk është dinjitoze për asnjë zyrtar nëse ka ndodhur që të jetë në ato kushte. Edhe kjo që merren rastet dhe zmadhohen dhe i faturohen si vijë sjellje një partie nuk është korrekte, edhe në jetë mund të ndodhë që derivon një pjesëtar. Po luhet si në Partinë e Punës. PS-ja është një familje e madhe dhe nuk është familje e cila nuk ka edhe njerëzit e vet problematikë. Nëse vërtetohen, PS-ja mban qëndrimin e vet dhe që e ka mbajtur deri tani.
Nëse marrim rastet, ju keni Gërdecin, dhe më të rëndë, kur drejtori ishte me urdhër arresti dhe ishte drejtor se donte ta mbante kryeministri. Ka edhe vrasjen në bulevard, që nuk ishin asgjë kontigjent krimi. Unë nuk mund të them se një familje nuk janë në ritmin e asaj shoqërie, por nuk mund të etiketohet familja.
Ne nuk kemi futur në parti testet e drogës, as PD-ja. Mos më bëni të them ca emra që e bëjnë më keq se ai i Bulqizës, se nuk është detyra ime, por e di të sigurt. Personalisht them, se kur të duan gjatë vitit nga 15 herë në muaj shkon e bëj unë testin. Vijnë ndonjë herë në Lezhë, por mos lodhen të vijnë se vetëm korrektesë do të gjejnë. Unë jam gati të shkoj kur të duan ata për test. Kush ka lidhje, kostoja është personale. Janë shumë pak për të dëmtuar ujin e PS-së”, përfundoi ai.
Gazetari investigativ Artan Hoxha publikoi videon e kryebashkiakut të Bulqizës, Lefter Alla, duke konsumuar kokainë. Pas publikimit të pamjeve, një reagim erdhi nga Alla, i cili e ka cilësuar videon si montazh duke pretenduar se i është bërë edhe presion nga grupet kriminale, që sipas tij, veprojnë në Bulqizë për interesa biznesi. Tashmë SPAK ka nisur hetimin për kryebashkiakun e Bulqizës, i cili u filmua duke marrë kokainë në ambiente publike.
U filmua me lëndë narkotike, SPAK nis hetimet për kryebashkiakun Alla
