Pas zbulimit të skandalit ‘Reket’, që u shoqërua me dorëheqjen e ish-prokurores Speciale Publike të Maqedonisë së Veriut, Katica Janeva, ka ardhur edhe reagimi i kësaj të fundit.
Janeva shprehet se ajo ka biseduar me Kamçevin në cilësinë e prokurores dhe se e gjithë kjo, është realizuar për të nxjerrë më shumë informacione, teksa shton se kjo ka qenë pjesë e hetimit të mëtejshëm.
“I kam dëgjuar incizimet e postuara në portale që kanë lidhje me rastin “Reket”. Jam e habitur se si veprimet e mia si prokurore speciale vihen në korrelacion me rastin “Reket”. Si prokurore speciale është detyra ime të kontaktoj me të gjithë të dyshuarit, si dhe personat e tjerë lidhur me procedurat penale në këtë Prokurori Publike dhe të përpiqem të nxjerr sa më shumë informacione për të përmirësuar pozicionin për secilin hetim / për çdo rast individualisht.
Kam folur për rritjen e nivelit të bashkëpunimit me të dyshuarit, për të zbuluar informacione të reja në lidhje me hetimin, më saktë, përmirësimin e pozicioneve tona si prokurorë publik, por në asnjë mënyrë, në asnjë kohë, nuk kam bërë pazar për ndonjë ndikim, nuk kam abuzuar me pozitën time zyrtare dhe nuk kam vepruar në kundërshtim me ligjin. Një prokuror është gjithmonë një prokuror, edhe kur bisedon me të dyshuarit përmes telefonit, ndërsa për këtë rast në atë kohë kishte arsyetim”, shkruan mes tjerash Janeva.
Dorëheqja e Janevës erdhi pas publikimit të materialeve nga e përditshmja italiane “La Verita”, ku pretendohet që dëgjohet zëri i saj duke biseduar me biznesmenin Orce Kamçev
