Komisioni i Disiplinës më datë 15/12/17 mori vendimin sa i përket dhunës së ushtruar ndaj arbitrit Alvi Paço, në Përmet nga stafi teknik dhe futbollistët e ekipit të Këlcyrës. Vendimi ka qenë mjaft i ashpër ku KF Këlcyra do të përjashtohet nga gara për pjesën e mbetur të Kampionatit për sezonit futbollistik 2017/2018. Por nuk ka mbetur me kaq, pasi dënime mjaft të ashpra ka pasur edhe për zyrtarët e klubit të cilët dënohen me gjobë dhe përjashtim nga aktiviteti për vite dhe gjoba të majme.
KF Këlcyra ankimoi vendimin, duke kërkuar të mos dënoheshin në bazë të pikës 7 të Komisionit të Disiplinës, por në bazë të neneve 78 dhe në vazhdim. Pas shqyrtimit të kërkesës dhe vëzhgimit në detaje të ngjarjes Komisioni i Apelit ndryshoi vendimin duke e dënuar ekipin me 14 ndeshje pa tifozë dhe humbjen në tavolinë me KF Përmetin 3-0. Kujtojmë që ky vendim ka ardhur menjëherë pas zgjedhjeve të mbajtura në FSHF, ku u rikonfirmua si presidenti i saj Armand Duka.
Vëren se:
Me vendimin e datës 15.12.2017 (pika 7) Komisioni i Disiplinës pranë FSHF ka vendosur:
KF “Këlcyra”, për dështim ne përmbushjen e përgjegjësive duke cenuar sigurinë e zyrtarëve të ndeshjes dhe shkelje të rënda të kryera nga stafi teknik dhe lojtarët e këtij ekipi duke shkaktuar ndërprerjen përfundimtare të lojës në ndeshjen kundër KF “Përmeti”, në bazë të nenit 12/1/f ,28, 49/5, 58/2, 65/2,65/4 dhe 66/3/c) të KDS, përjashtohet nga gara për pjesën e mbetur të Kampionatit për sezonit futbollistik 2017/2018. Ndeshja kundër KF “Përmeti”, deklarohet e humbur në tavolinë me rezultatin 3 me 0.
Kundër këtij vendimi ka ushtruar kërkesë ankimore të KF “Këlcyra” duke kërkuar ndryshimin e pikës 7 të Vendimit të Komisionit të Disiplinës datë 15.12.2017 pasi masa e dënimit nuk i përgjigjet rrethanave te shkeljes se kryer.
KOMISIONI I APELIT TË DISIPLINËS
Pasi dëgjoi relatimin e çështjes nga sekretariati teknik dhe si bisedoi e analizoi çështjen në tërësi, konstaton: Vendimi datë 15.12.2017 (pika 7) i Komisionit të Disiplinës pranë FSHF nuk është marrë në përputhje me Kodin e Disiplinës Sportive pasi masa e dënimit te aplikuar është e larte dhe nuk i përgjigjet shkeljes disiplinore te kryer.
PËR KETO ARSYE
Bazuar në nenet 78 e vijues te Kodit te Disiplinës Sportive
VENDOSI
1-Ndryshimin e vendimit të Komisionit të Disiplinës datë 15.12.2017 (pika 7) si mëposhte: KF “Këlcyra”, për dështim ne përmbushjen e përgjegjësive duke cenuar sigurinë e zyrtarëve të ndeshjes dhe shkelje të rënda të kryera nga stafi teknik dhe lojtarët e këtij ekipi duke shkaktuar ndërprerjen përfundimtare të lojës në ndeshjen kundër KF “Përmeti”, në bazë të nenit 12/1/f ,28, 49/5, 58/2, 65/2,65/4 dhe 66/3/c) të KDS, dënohet me 14(katërmbëdhjetë) ndeshje pa spektator në stadiumin përkatës. Ndeshja kundër KF “Përmeti”, deklarohet e humbur në tavolinë me rezultatin 3 me 0.
2-Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.
