Në rrugën “Myslym Shyri” në kryeqytet ka ndodhur ditën e sotme një ngjarje aspak e zakontë e cila ka habitur të gjithë banorët e zonës. Fëmija 10-vjeçar nga komuniteti rom, teksa po kërkonte lëmoshë, është përballur me dhunën e një prej drejtuesve të automjeteve.
Pasi e ka ofenduar të miturin drejtuesi ka dalë nga makina dhe me forcë e ka mbyllur atë në një prej kazanëve të mbeturinave. Menjëherë me marrjen e njoftimit nga banorët, në vendngjarje mbërritën me shpejtësi punonjësit e Policisë Bashkiake, të cilët bënë të mundur nxjerrjen dhe dërgimin e fëmijës në Komisariatin Nr.2 të Policisë së Shtetit.
Për shkak të gjendjes së rënduar psikologjike si pasojë e dhunës së ushtruar, u lajmërua edhe psikologu, ndërkohë që ka nisur puna për sekuestrimin e pamjeve filmike të cilat do të lehtësojnë identifikimin e autorëve dhe vënien e tyre para drejtësisë.
