Reforma në drejtësi tani është ende në hapat e parë të saj, por duhej të ishte drejt fundit. Pas zgjedhjeve të 25 qershorit vëmendja ndaj saj ka humbur. Në një tryezë diskutimi Rainer Deville, ish drejtues i misionit EURALIUS tha se është i nevojshëm hartimi i një agjende, ku të shkruhen prioritetet për reformën dhe të vihen në zbatim.
“Gjatë vitit 2017 progresi i reformës në drejtësi nuk ka qenë shumë i madh. Ne na duhen më shumë prioritete për reformën në drejtësi. Çdo ligj është i parëndësishëm nëse ai nuk zbatohet. Duhet ta shohim në praktikë a i kemi kapacitetet për të vënë në jetë reformën. Shoh që vëmendja ka humbur, duhet të krijohet një kalendar për të parë se cilat janë gjërat që duhen bërë”, tha Deville.
Deville u ndal edhe te vettingu, duke thënë se duhet kujdes në financimin e anëtarëve për të mos krijuar hapësira për korrupsion.
“Do duhej që në parlament të kishte më shumë impenjim për vettingun, por duhet të them se një ndër problemet më të mëdha ka qenë financimi. Fillimisht për anëtarët u vendos një pagë trefish më e lartë se e kryeministrit, ndërsa më pas kjo ndryshoi. Duhet kujdes me financimin për të mos krijuar raste korrupsioni. Po ashtu duhet parë nëse këta anëtarë janë të pavarur”, u shpreh Deville.
Ndërsa për ekspertin Afrim Krasniqi vettingu po përdoret nga politika gjë e cila rrezikon thelbin e vet reformës.
“Ne luftuam shumë dhe u përpoqëm shumë me presion publik dhe ndërhyrjen e institucioneve që të plotësohen numra përkatës dhe institucionet të kenë një adresë. Për shkak të sasisë, unë personalisht besoj që nuk i jemi përgjigjur cilësisë. Ne si institut kemi gjetur të paktën një rast që është shkelje e dukshme kushtetuese, ku një kryetar partie është zgjedhur anëtar i vettingut dhe është në kundërshtim me nenin kushtetues. Pse duhej që ditën e parë që të zbatojmë kushtetutën, ta injorojmë kushtetutën për shkak të nevojës së ditës”, tha Krasniqi.
Në tryezë ishin të pranishëm përfaqësues të universiteteve dhe të shoqërisë civile të cilët diskutuan dhe bënë analiza mbi progresin e reformës në drejtësi dhe sfidat në të ardhmen.
