Blerja online është një fenomen që po përhapet gjithnjë e më tepër me zhvillimin e teknologjisë dhe mundësisë për të blerë produkte pavarësisht largësisë dhe vendndodhjes së konsumatorit.
Të shumta kanë qenë rastet kur konsumatori ka rënë pre e mashtrimeve të uebsajteve të cilat pasi kanë marrë pagesën nuk kanë dorëzuar produktin.
Në momentin që këto shifra kanë të bëjnë me shitblerje të produkteve të shtrenjta, si janë makinat atëherë ky fenomen përbën skandal dhe me denoncimin e konsumatorit mbi të cilin është abuzuar, duhet të ndëshkohet sipas ligjeve përkatëse.
Redaksia e Tirana Today ka realizuar një investigim pas një denoncimi të marrë nga qytetari me inicialet F.N banues në lagjen Ali Demi në Tiranë. Personi ka paguar 7300 dollarë për blerjen e një automjeti. Pas pagimit të parave makina nuk erdhi fare në Shqipëri. Ndërkohë qytetari nuk ka asnjë mundësi komunikimi me kompaninë, pas shkëputjes së çdo kontakti nga ana e tyre.
Pas denoncimit redaksia e Tirana Today kërkoj bashkëpunimin me buytoamerica.com për të hedhur më shumë dritë mbi këtë skandal. BuyToAmerica është një kompani e ndërmjetme që merret me dërgesat e blerjeve që qytetarë nga e gjithë bota bëjnë në Amerikë.
Kjo kompani ka shqyrtuar dhe ka arritur të parandalojë 12 raste mashtrimesh të “ AUTO BRAND NET” dhe ka denoncuar këto raste duke kërkuar që http://autobrandnet.com/ të mbyllet. Kjo kompani mundi ti kursej 12 shqiptarëve kursimet e një jete për të blerë një makinë me çmim të arsyeshëm në internet.
Kompania mashtruese “AUTO BRAND NET” është duke vjedhur shqiptarët. Pasi shqiptarët dhe të tjerët paguajnë për të blerë një makinë në këtë kompani atyre nuk u vjen makina dhe u shkëputet çdo mjet komunikimi.
Redaksia e Tirana Today ka tentuar që të kontaktojë me http://autobrandnet.com/ por ka qenë e pamundur.
E vetmja mundësi që kemi është të informojmë shqiptarët se kompania http://autobrandnet.com/ është duke vjedhur të gjithë blerësit e saj.
Në falenderojmë kompaninë buytoamerica.com për mundësinë që na dha që përmes këtij investigimi të informojmë qytetarët duke i paralajmëruar të bëjnë kujdes. (Tirana Today)
