Gjermania po bëhet gati për një koalicion të madh mes partive kryesore, kristian-demokratëve të kancelares Angela Merkel dhe social-demokratëve të Martin Schulz.
Një javë pas dështimit të bisedimeve ndërmjet CDU-së, liberaldemokartëve dhe të gjelbërve, për të ashtuquajturin koalicioni “Jamaica”, Merkel dhe Schulz kanë rënë dakord të ulen në tryezë.
Bisedime do të ndërmjetësohen nga presidenti i vendit, Frank-Walter Shtanmajer, nxitësi kryesor i ujdisë mes palëve dhe daljes së Gjermanisë nga ngërçi politik që prodhuan zgjedhjet e shtatorit.
Në pozitën më të vështirë qëkurse ka marrë drejtimin e kreun e kristian-demokratëve, Merkel doli këtë të shtunë anëtarëve të CDU-së, gjatë konventës së partisë, duke bërë thirrje për qetësi dhe përjashtoi mundësinë e zgjedhjeve të reja.
“Ka nevojë për një Gjermani të fortë. Për këtë nevojitet krijimi sa më shpejt i një qeverie. Populli ka votuar. Unë jam totalisht kundër mundësisë së zgjedhjeve për diçka që kemi vështirësi ne ta zgjidhim”, deklaroi Merkel.
Edhe kreu i social-demokratëve Martin Schulz, i cili më herët kishte refuzuar kategorikisht një aleancë me Merkel, tha përpara mbështetësve të SPD-së se hyrja në qeveri do t’i lejojë të përmbushë qëllimin kryesor, përmirësimin e jetës për gjermanët, shkruan bota sot.
Kriza politike në Gjermani mban në ankth mbarë Europën, për vetë rolin vendimtar që ka vendi në sfidat kryesore që ka kontinenti, si Brexit, kriza e emigrantëve apo siguria.
