Shoqata e Transportit Qytetas kërkoi një ditë më parë nga qeveria dhe Bashkia e Tiranës që të marrin në konsideratë heqjen e disa taksave nga karburantet e përdorura prej autobusëve urbanë, si edhe subvencionimin e tarifës për kategoritë e personave që udhëtojnë pa pagesë. Në të kundërt, nëse nuk plotësohen kërkesat, nga 1 marsi ata do të ndërpresin shërbimin e transportit urban për qytetarët. Ministrja e Financave dhe Ekonomisë, Delina Ibrahimaj, është pyetur nga gazetarët në lidhje me këtë kërkesë, duke thënë se do të ulen dhe të flasin me pronarët e urbanëve për të gjetur një zgjidhje.
“Do t’i marrim në shqyrtim kërkesat e shoqatës së transportuesve. Ne mendojmë e besojmë se rritja e çmimeve do të jetë tranzitore, por jo e qëndrueshme. Nuk mund të ndërhyjmë në nisma për efekt të luhatjes së çmimeve, që kanë ndodhur dhe më parë e do të ndodhin dhe në të ardhmen.
Për sektorë të veçantë mund të diskutojmë mbi efektet që këto sektorë kanë nga rritja e çmimeve. Patjetër që do të kemi tryeza konsultative me sektorin përkatës, për të diskutuar mbi ecurinë e tyre, mbase dhe për të marrë një vendimmarrje.
Sektori i transportit ka qenë i goditur fort nga pandemia. Çmimet e transportit kanë reflektuar goditjen që sektori ka pasur.
Ministria e Financave ka mbajtur një qëndrim mbështetës, e ka stimuluar sektorin, duke e nxitur në mënyrë që të mos vuajë pasojat e krizave. Ne presim që çmimet të jenë kalimtare dhe jo të qëndrueshme”, theksoi ministrja Ibrahimaj.
