Teksa këto ditë, kryefjala ka qenë djegia e mandateve, nënkryetari i PD-së Edmond Spaho ka treguar edhe strategjinë që do të ndiqet më tej. I ftuar në studion e ‘SYRI.net’, Spaho tha se çdo të enjte vendi do të gumëzhijë nga protestat. Po kështu, sipas tij, askush nuk duhet të surprizohet që të anulohet edhe seanca e ditës së enjte. Spaho rrëfeu më tej se në 16 mars pritet të jetë një tjetër protestë e madhe përballë Kryeministrisë, e ato nuk do të ndalen deri në dorëheqjen e Ramës.
“Ne kemi zgjedhur rrugën e protestave. Ato do të jenë të kombinuara. Në qendra qarku nëpër Shqipëri dhe protesta në Tiranë, ku do të ketë protesta çdo të enjte tek Parlamenti.
Nuk mund të jetë çudi që të anulohet edhe seanca e ditës së enjte, pasi protesta e 21 shkurtit ishte po aq e madhe sa e 16 shkurtit.
Protesta tjetër e madhe në Tiranë do të jetë ajo e 16 marsit, përballë Kryeministrisë, dhe do të vazhdojnë protestat deri në dorëheqjen e Edi Ramës”, tha Edmond Spaho.
