Çeku prej pesë mijë lekësh në formën e një bonusi për çdo jetë të re që i shtohet qytetit, do të zëvendësohet me një shportë me produkte që do të blihen nga Bashkia. “Drejtoria e Përgjithshme e Shërbimeve Sociale, propozon që kostoja e parashikuar për një ‘Shportë bebeje’, të mos e kalojë shumën maksimale 5.000 lekë për çdo fëmijë të lindur që regjistrohet”. Kështu citohet në vendimin që do të merret nesër nga Këshilli Bashkiak, pa dhënë arsye për rrëzimin e atij të vitit 2007 për bonusin e të sapolindurit.
Çdo i porsalindur që vjen në jetë në një nga dy maternitetet shtetërore “Mbretëresha Geraldinë” dhe “Koço Gliozheni”, nuk do të trajtohet më me bonusin e bebeve nga Bashkia.
Po çfarë përmban shporta?
Shporta përmban gjithë çfarë u duhet bebeve, që nga pelenat njëpërdorimshme, letrat e lagura, kremin, vajin, biberonin fals e deri te libërthi për kujdesin ndaj fëmijës në vitin e parë të jetës. Të gjitha këto blerje do të bëhen përmes prokurimit publik. Do të jenë përfaqësuesit e Bashkisë, ata që do të sigurohen që vlera e shportës të mos e kalojë shumën që jepte dikur Bashkia në formën e bonusit cash.
‘Shporta e bebes’ i jepet nënës nëse plotëson një nga kriteret e mëposhtme:
1. Të dy prindërit janë me vendbanim të përhershëm në Bashkinë Tiranë, dhe foshnja ka lindur në maternitetin publik “Mbretëresha Geraldinë” ose “Koço Gliozheni”. 2. Një prind është me vendbanim të përhershëm në Bashkinë Tiranë dhe foshnja ka lindur në maternitetin publik “Mbretëresha Geraldinë” ose “Koço Gliozheni”, thuhet në relacionin e projektvendimit të nisur për miratim në Këshill.
