Më herët, Ministrja e Financave dhe Ekonomisë, Delina Ibrahimaj, shokoi mbarë opinionin publik ku tha se një shqiptari i duhen 140 euro për të mos u konsideruar i varfër.
Sot në Komisionin e Ekonomisë, ku po shqyrtohet propozimi i qeverisë për ndryshimin e buxhetit të vitit 2022, ministrja Ibrahimaj theksoi se në deklaratën e saj nuk ka thënë minimumin jetik, por ka cituar një statistikë sipas përllogaritjeve që bën INSTAT. Duke iu referuar shifrave, Ibrahimaj citoi se shifra që i duhet një personi në Shqipëri për të mos u konsideruar i varfër, ulet nga 130-140 euro, në 126 euro, gjithmonë sipas INSTAT.
“Ju bëtë një referencë për minimumin jetik. Në asnjë moment unë nuk kam deklaruar minimumin jetik. Më është bërë një pyetje për një tregues statistikor që publikohet nga INSTAT, që i takon kufirit të varfërisë dhe iu jam referuar kufirit të varfërisë të llogaritur nga INSTAT që për frymë është 126 euro, mund t’i referoheni INSTAT me mënyrën e llogaritjes së tyre që është metodologji e EUROSTAT, që aplikohet në gjithë vendet e rajonit. Pra nuk jam shprehur për llogaritje të Ministrisë së Financave dhe Ekonomisë, por për një tregues statistikor të publikuar nga INSTAT”, u shpreh Ibrahimaj.
