Këshilli i Europës iu kërkoi autoriteteve greke që të marrin masa konkrete për të ndryshuar situatën në kampet e imigrantëve në ishujt e Detit Egje.
Komisionerja për të drejtat e njeriut të Këshillit të Europës, Dunja Mijatovic e cilësoi tronditës faktin që azilkërkuesit përballen me kushtet e tmerrshme higjenike. “Imazhi është tronditës për Europën e shekullit XXI”.
Gjatë një konference shtypi, disa orë para votimit në Parlament të një projektligji që parashikon ashpërsimin e procedurës së azilit, Mijatovic theksoi: “Situata e imigrantëve, duke përfshirë azilkërkuesit, në ishujt grekë është tronditëse dhe në prag të katastrofës”.
Për rrjedhojë, ajo kërkoi ndërmarrjen e masave të menjëhershme dhe reagimin ndaj kushteve të këqija, ku jetojnë mijëra qenie njerëzore.
Në kampet e pesë ishujve grekë, që kanë një kapacitet prej 6 300 personash, jetojnë më shumë se 34 mijë persona.
