Gjermania ka shënuar sërish rritje masive të infektimeve. Në video-mesazhin javor, kancelarja Merkel kërkoi nga qytetarët që të reduktojnë sa të mundin kontaktet personale, për të ulur valën e pandemisë.
“Nuk jemi të pafuqishëm ndaj virusit, sjellja jonë vendos se sa i fortë është ai dhe sa shpejt përhapet. Kërkesa e momentit është për të gjithë ne: reduktoni kontaktet. Takoni sa më pak njerëz”, tha Merkel.
I njëjti apel u përsërit edhe një javë më parë nga Merkel. Ajo kërkoi bashkëpunimin e qytetarëve, dhe bëri thirrje për kujdes në kohën e rritjes së infektimeve. Ky apel shkaktoi shumë reagime në Gjermani.
“Vetëm një javë, situata e pandemisë është ashpërsuar”, tha Merkel këtë të shtunë. Për mua vlen ajo që u thashë javën e kaluar, fjalë për fjalë”.
Në video-mesazhin e para një jave, Merkel kërkoi uljen e kontakteve familjare, moskryerjen e udhëtimeve të panevojshme, dhe bëri thirrje që njerëzit të qëndrojnë në shtëpi.
