Shefja e departamenitt të sëmundjeve infektive pranë Institutit të Shëndetit Publik, Silva Bino, ka konfirmuar se në vendin tonë nuk ka raste me linë e majmunit. Risku ekziston, por sipas saj, gjasat janë tejet të vogla.
“Deri tani s’kemi asnjë rast me linë e majmunit në Shqipëri. Risku ekziston, por është i ulët për momentin. Por vëmendja dhe vigjilenca duhet rritur”.
E pyetur se cilat janë shenjat dhe si transmetohet lija e majmunit nga njeriu tek njeriu, Silva Bino tha se nis me temperaturë, dhe ka rritje të gjendrave limfatike ku shfaqet në lëkurë.
“Fillon me temperaturë, ka rritje të gjendrave limfatike, pastaj fillon me shfaqjen në lëkurë. Fillon në fytyrë, pëllëmbët e duarve dhe shputat e këmbëve dhe pastaj në gjithë trupin.
Në të gjitha këto faza, personi është infektues, në qoftë se prek rrobat, çarçafët, peshqirët, duke qenë se shfaqet dhe në gojë dhe mjetet e ngrënies mund të jenë mjete transmetuese të virusit”.
Pas Italisë, është regjistruar rasti i parë me linë e majmunit edhe në Greqi, duke iu afruar kështu gjithnjë e më pranë vendit tonë. Organet greke të shëndetit janë vënë në alarm pas shfaqjes së simptomave të lisë së majmunëve tek një turist britanik në ishullin e Kefalonisë.
