Kukësi ka zhvilluar një ndeshje të madhe përballë Partizanit në “Zeqir Ymeri”, duke i dhënë një leksion të qartë futbolli dhe e mposht me rezultatin e thellë 4-0. Me këtë fitore verilindorët kanë blinduar vendin e sytë dhe mund të marrin pjesë edhe në Champions League nëse qëndron vendimi i UEFA-s për dënimin e Skënderbeut.
Pas 5 ndeshjeve fantastike nga të kuqtë me në krye, Klevis Dalipin vjen dhe zhgënjimi i parë përballë një rivali direkt. Ishte Kukësi që dominoi takimin që nga minuta e parë dhe për meritë të Sidrit Gurit që arriti të shënonte një tregolësh fantastik mposht me rezultatin e thellë 4-0 të kuqtë. Pas këtij tregolëshi, Guri bëhet edhe kryegolashënuesi i kampionatit pasi ka shënuar 15 të tillë.
Golin tjetër atë të 2-0 e realizoi mesfushori gjeorgjian Irakli Dzaria. Një fitore e merituar dhe më e thella në përballjet direkte për Kukësin ndaj Partizanit. Tashmë vendi i dytë për skuadrën e trajnerit austriak Peter Pacult është pothuajse i sigurt, pasi diferenca me të kuqtë është 9 pikë.
Një fitore të rëndësishme mori edhe Luftëtari që falë golave të Bregut pas një aksioni model dhe të Shkurtajt me penallti, mposhti 2-1 Laçin në Gjirokastër, me bluzinjtë që parakaluan pikërisht kurbinasit në renditje duke u ngjitur në vendin e 4-ët. Mund të buzëqeshë më në fund edhe Flamurtari që me finalizimet e Nedjelkovic dhe Useinit, mposhti 2-0 Lushnjën në Roza Haxhiu duke u rikthyer te fitorja pas 8 javësh.
