Qëndrimi për një kohë të gjatë në shtëpi nga koronavirusi, ka sjellë edhe konsumimin e produkteve ushqimore. Kjo epidemi mund të zgjasë edhe për muaj me radhë, ndaj banorët të panikosur janë turrur drejt dyqaneve për të blerë ushqimet më bazike. Radhë të gjata kanë nisur të formohen që pa gdhirë përpara supermarketeve në Hong Kong. Kërkesat më të mëdha janë ato për oriz, letër higjenike dhe dezinfektues.
Për të tretën javë radhazi, raftet e supermarketeve që zakonisht janë të mbushura plot me pako orizi (ushqimi kryesor për banorët e Hong Kongut), janë bosh. Makaronat gjithashtu mungojnë, ndërsa ka ende me bollëk mish e perime. Supermarketet kanë nisur të zbatojnë një “politikë racionimi” , duke i detyruar klientët të blejnë vetëm nga dy artikuj, të cilat i kanë me pakicë.
Njerëzit janë të frikësuar, ndonëse Hong Kong-u ka vetëm 50 raste të konfirmuara të koronavirusit dhe një vdekje. “ Duket sikur jemi në luftë”, thotë një shitës, “produktet zhduken nga raftet sa hap e mbyll sytë”.
Sipas njohësit të shkencave politike, Joseph Cheng, paniku që ka pushtuar banorët buron nga mosbesimi i thellë ndaj qeverisë, e cila shihet gjerësisht si e paaftë për të menaxhuar krizën.
Organizata Botërore e Shëndetësisë, u kërkoi vendeve të marrin masa sa më të ashpra në luftimin e koronavirusit të ri.
Bashkimi Evropian paralajmëroi një takim të jashtëzakonshëm të Ministrave të Shëndetësisë, që do të mbahet të enjten.
Koronavirusi, i cili është shfaqur për herë të parë në fund të vitit të kaluar, në qytetin Vuhan të Kinës, shkakton infeksion të rëndë akut të frymëmarrjes dhe simptomat zakonisht fillojnë me ethe dhe kollë të thatë. Aktualisht nuk ka vaksinë për të.
