Sokol Nano, djali i ish-kryeministrit Fatos Nano, ka dashur të jetë pjesë e listës së kandidatëve për deputetë në zgjedhjet e 18 qershorit.
Negociatat kanë nisur para një jave, por papritur të shtunën ndodhi “surpriza”, pasi Rama ka miratuar si kandidat për deputet djalin e Servet Pëllumbit dhe jo Sokol Nanon.
“Deri të shtunën çdo gjë ishte ok. Gjërat kanë ndryshuar kur është diskutuar për të zgjedhur midis djalit të Fatosit dhe djalit të Servet Pëllumbit. Ç’të them, unë nuk kam qenë atje, por flet vetë përfundimi, është miratuar djali i Servetit dhe jo Sokoli”, janë shprehur burimet pranë Nanos, për CityNews.
Mësohet se brenda selisë së socialistëve ka patur edhe shumë anëtarë të tjerë të Kryesisë që kanë këmbëngulur për të qenë djali i Servet Pëllumbit, Arben Pëllumbi, i tetëmbëdhjeti në listën e kandidatëve të PS-së për Tiranën, dhe jo Sokoli i Fatos Nanos.
Në këtë dyluftim, Edi Rama ka vulosur përfundimisht nxjerrjen jashtë lojës politike të djalit të Fatos Nanos, Sokolit.
