Deputetja e Partisë Demokratike, Jorida Tabaku, ka dalë pas rreth 2 orë e gjysmë nga dyert e SPAK. Ajo tha se është thirrur në cilësinë e kallëzueses për inceneratorët e Tiranës dhe Fierit. Në një prononcim për mediat, Tabaku theksoi se ka qenë në komunikim të vazhdueshëm me prokurorët e SPAK në lidhje me ecurinë e hetimeve, ndërsa shtoi se shumë shpejt do të ketë fakte të reja.
“Unë që në 2018 kam denoncuar aferën e inceneratorëve në emër të PD. Kemi sjellë 3 kallëzime, për inceneratorin e Tiranës, Fierit dhe të Elbasanit.
Solla 9 kallëzime të tjera. I pari ishte për raportin dhe 8 të tjerët ishin për individë që gjykojmë për aferën e inceneratorëve, Janë 500 të akuzuar që kanë dalë në këtë komision dhe mbi 150 fakte ose grup fakte që ja kemi vendosur SPAK.
Sot isha për çështjen e inceneratorit të Fierit dhe të Tiranës. Informova për zhvillimet e Komisionit Hetimor, për sqarime dhe faktet. Që lidheshin për dëshmitë dhe materialet që kemi mbledhur gjatë punës pranë Komisionit dhe me komunikimet që kam pasur.
Kam qenë në komunikim të vazhdueshëm me SPAK, sa i përket hetimeve, duke kërkuar informacion se në çfarë ndodhen hetime, por dhe në statusin e personit që denoncova. Sot kam qenë në cilësinë e kallëzueses për inceneratorin e Tiranës dhe të Fierit. Kam një listë dëshirash se kush duhet të vijë në SPAK. Sot si mora ata në pyetje, më kërkuan informacion. Shumë shpejt do të kemi të reja në fazën që ndodhen hetimet. Hetimi i aferës ka qenë një prioritet jo vetëm i punës time, por dhe hetimet kanë ecur në organin e akuzës”, tha Tabaku.
“Unë kam dorëzuar 8 padi. Prokuroria është duke i hetuar ato sipas dosjeve të veçanta, sipas qyteteve. Afera e gjitha është ngritur jo vetëm në Tiranë, jo vetëm në Elbasan, apo në Fier, veprimet e tre inceneratorëve kanë krijuar një kosto shtesë në buxhetin e shtetit. E kam trajtuar të gjithë çështjen e plotë, 60 të akuzuar, 430 mln euro.
Në gjykimin tim duhet të trajtoheshin si një çështje e vetme. Është një skemë e mirëfilltë kriminale dhe një grup i mirëfilltë kriminal. Prokurorët ndoshta bëjnë mirë që janë kaq hermetikë dhe nuk japin informacion, është e drejtë që ka kaq interes të madh publik, por besoj se janë gjëra që iu takojnë atyre”, deklaroi ajo.
