Drejtësia humbi një avokate të njohur dhe shumë të zonjën, por edhe një nënë shembullore. Bëhet fjalë për Denisa Dakën, e cila prej shumë vitesh merrej me çështjet civile.
Avokatja vuante prej kohësh nga një sëmundje, dhe kishte nevojë për transplant të palcës. Daka ishte e njohur edhe për mediat për shkak se shpesh denonconte fenomene të ndryshme. Miqtë dhe kolegët e saj e njihnin si avokate që nuk njihte humbje, madje mund të thuhej se ajo ishte një nga avokatet tejet serioze që i njihte mirë procedurat.
E përkushtuar prej vitesh në profesionin e saj, serioze, këmbëngulëse dhe tepër humane, ajo i i gjendej jo vetëm në ndihmë klientëve, por edhe duke i sugjeruar dhe këshilluar.
Daka është nënë e dy fëmijëve. Me punën e saj ajo rriti e vetme dy fëmijët e saj, që janë në moshë të mitur, por fatkeqësisht nuk i’a doli të linte së paku një shtëpi për ta. Ata sot janë pa nënë e pa baba. Kontributi financiar do lehtësonte sado pak dhimbjen e dy fëmijëve të saj, të mbetur jetimë dhe pa asnjë përkrahje. Të bëhemi bashkë e t’u blejmë një shtëpi për të mos i lënë në mëshirë të fatit!
