Shtyhet sërish seanca ndaj ish-ministrit të Brendshëm në Prokurorinë e Krimeve të Rënda. Saimir Tahiri, pasi doli nga Gjykata deklaroi për mediat se zgjatja e hetimeve në mënyrë të herëpashershme ka tejkaluar çdo limit.
Duke folur për mediat, Tahiri u shpreh se pret që Prokuroria e Krimeve të Rënda të nisë një hetim për nxjerrje të sekretit hetimor, teksa akuzoi prokurorët se i kanë thënë të gjitha, duke u dërguar mesazhe gazetarëve.
Ish-ministri i cili akuzohet për lidhje me bandën e Habilajve e njohur për trafikim të lëndëve narkotike, e mbylli fjalën e tij me mesazhin se “nuk kalon njeri pa marrë faturën që meriton”.
Deklarata e plotë:
Kam pritur dhe do pres deri në fund, pavarësisht se gjithçka që po ndodh e ka kapërcyer çdo limit. Një mjegull e tillë s’mund të vazhdojë dot më, pavarësisht se hetimet janë zgjatur 5 herë, kjo është hera e parë që kërkoj të mos ndodhë më. Mendoj se ka kaluar çdo afat të arsyeshëm. Drejtësia e vonuar nuk është më drejtësi. Nqs kjo ndodh me mua, imagjinoni çfarë ndodh me njerëzit e tjerë që bërtasin e dëgjohen.
Unë nuk mbahem peng nga askush. Kam respektuar drejtësinë, është sakrificë nga ana ime ta respektoj drejtësinë, por i kam respektuar sepse mendoj se cdo vendim nuk do ishte i drejtë. Kam vendosur të hesht, e pastaj do flas.
Ma besoni, kjo çështje ka kapërcyer çdo limit të arsyeshëm. Sot seanca u shty, merre me mend!
S’kishte asnjë sekret,keni aq shumë mesazhe nga prokurorët sa nuk keni më asnjë sekret. U la për të hënën sepse gjykata kërkoi dokumente që prokurorët nuk i kishin. Në Itali prokuroria dhe antimafia dhe gjykata ka thënë ky njeri nuk ka lidhje, këtu zgjatet sepse kanë frikë se nuk dinë si ta mbyllin.
Pres që dhe në rastin tim prokuroria të nisë hetim për nxjerrje të sekretit hetimor. Nuk e kam humbur durimin, e ka humbur sensin. Ka kohë për të gjitha, ma besoni këtë! Nuk kalon njeri pa marrë faturën që meriton!/Tirana Today
