Qeveria franceze paralajmëron se do ta përdorë veton e saj, për shtyrjen e Brexit, si pasojë e mungesës shqetësuese të përparimit në bisedimet e fundit për këtë çështje.
Ministri i Jashtëm francez, Jean-Yves Le Drian, është shprehur i pakënaqur me situatën e Brexit, dhe bisedimet e Brukselit për çështjen e kufirit me Irlandën.
Sipas tij, ka një mungesë të propozimeve reale nga ana e qeverisë britanike, lidhur me zgjidhjen e kësaj çështjeje.
“Kjo është shumë shqetësuese. Britanikët duhet të na tregojnë se çfarë dëshirojnë”, deklaroi Le Drian.
Sa i përket mundësisë për shtyrjen e Brexit, përtej datës 31 tetor, ministri francez u shpreh se durimi i BE-së po venitet.
“Nuk do ta bëjmë këtë gjë çdo tre muaj”, tha ai.
Qeveria britanike ka thënë se dëshiron ta shmangë kontrollin kufitar me Irlandën, gjë që do ta mbante Britaninë pjesë të unionit të doganave dhe Irlandën Veriore pjesë të një tregu të përbashkët.
Komentet e ministrit të jashtëm francez duket se janë konfirmim publik se bisedimet në Bruksel nuk kanë substancë. Bashkimi Evropian ka thënë se shtyrja e dytë e Brexit-it do të arsyetohej vetëm me mbajtjen e referendumit të ri ose mbajtjen e zgjedhjeve të parakohshme, shkruan “The Guardian”.
