Gjykata Kushtetuese ka shtyrë seancën lidhur me padinë e përbashkët të Shoqatës Kombëtare të Gjyqtarëve dhe Unionit të Gjyqtarëve të Shqipërisë për shfuqizimin e 25 neneve nga paketa e tre ligjeve kryesore të reformës në drejtësi.
Ditën e sotme u zhvillua seancë me dhomë këshillimi pa praninë e palëve dhe medias, ndërsa Gjykata Kushtetuese shtyu vendimin, i cili do të merret më datë 28 shtator.
Lidhur me këtë padi të shoqatave të gjyqtarëve, ditën e djeshme Kuvendi i Shqipërisë argumentoi se kërkuesve u mungon legjitimiteti dhe se procesi i kontrollit të pastërtisë së figurës është bazuar tek standardet ndërkombëtare.
Por, çfarë përmban padia e Shoqatës Kombëtare të Gjyqtarëve dhe Unionit të Gjyqtarëve të Shqipërisë dorëzuar më 1 qershor në Gjykatën Kushtetuese?
Sipas padisë së dorëzuar në Gjykatën Kushtetuese, dy shoqatat që përfaqësojnë interesat e lobit të gjyqtarëve kërkojnë të bëjnë nul një seri kriteresh që lidhin sistemin e ri të karrierës dhe atë të procedimeve disiplinore në gjyqësor.
Padia dominohet nga përpjekja për të shfuqizuar një numër nenesh të ligjit të vettingut, të cilat rregullojnë kontrollin e pastërtisë së figurës së gjyqtarëve dhe prokurorëve për sa i përket lidhjeve dhe përfshirjes së tyre me krimin e organizuar.
Konkretisht, shoqatat kërkojnë shpalljen si antikushtetuese të pikave në ligj që legjitimojnë mbledhjen e informacioneve nga dëshmitarë të mbrojtur të prokurorisë, nga përgjimet telefonike të kryera nga agjencitë ligjzbatuese apo nga dëshmi konfidenciale që mund të mbërrijnë në institucionet e vettingut nga oficerë apo agjentë të policisë gjyqësore.
Shoqatat kërkojnë gjithashtu që gjyqtarët dhe prokurorët e përfshirë në procesin e vettingut të kenë të drejtën të japin dorëheqjen në çdo kohë, duke sjellë si rrjedhojë ndërprerjen e kontrollit. Sipas ligjit për “rivlerësimin kalimtar”, kjo e drejtë ka skaduar tre muaj pas hyrjes në fuqi të tij.
PARASHTRIMET E SHOQATAVE PËR LIGJIN E VETTINGUT:
Parashtrimet e Shoqatave Per Ligjin e Vettingut by Tirana Today on Scribd
