Në të fundit seancë plenare të Parlamentit për këtë legjislaturë u miratuan 16 projektligje. Parlamenti miratoi ndryshimet në Kodin e Procedurës Penale ku ashpërsohen dënimet për dhunën ndaj mjekëve, e policëve përfshi krimet që lidhen me dhunën në sport sikurse për falsifikatorët e ushqimeve.
Me 96 vota pro, 11 kundër dhe 2 abstenim janë miratuar ndryshimet në Kodin Penal. Për ndryshimet duheshin 84 vota, të cilat shumica nuk i ka, por ishin deputetët e opozitës së re që jo vetëm plotësuan numrin, por e kaluan në 96 pro. Ndërkohë që 11 deputetë ishin kundër dhe 2 abstenuan. Ndryshimet që janë miratuar lidhen me mbrojtjen e të drejtës së autorit, ruajtjen e qetësisë publike, sigurinë shëndetësore, sigurinë ushqimore, mbajtjen e armëve pa leje, mbrojtjen e mjedisit dhe kodin elektoral.
Nënkryetari Kuvendit, Muslim Murrizi, shprehu skepticizëm për ndryshimet në kodin e procedurës penale.
Ndërtimi i dy rrugëve Milot-Ballderen dhe Orikum-Llogara me Partneritet Publik Privat mori dritën jeshile nga Parlamenti.
Sakaq, propozimi i presidentit për Petraq Milon në krye të KLSH, si dhe ai i 28 deputetëve për shkarkimin e Arben Malajt nga Bordi Drejtues i Bankës së Shqipërisë, u shtynë për në shtator.
