Akademia e Shkencave dhe Arteve në Shtetet e Bashkuara, ka njoftuar se ka shtyrë ceremoninë e ndarjes së çmimeve “Oscar”.
Sipas mediave të huaja, ceremonia nuk do të mbahet më datë 28 shkurt të vitit 2021 siç ishte planifikuar, po më 25 prill.
Kjo për shkak të situatës së krijuar nga pandemia e koronavirusit, e cila ka mbyllur shumë teatro në gjithë botën, si dhe ka ndalur prodhimin e filmave të rinj.
Gjithashtu Akademia ka shtyrë edhe datën e afatit të fundit të dërgimit të filmave që mund të garojnë për këto çmime, nga 31 dhjetori i këtij viti, në 28 shkurt të 2021-ës.
“Shpresa jonë, për shtyrjen e afatit të aplikimit, është që t’iu ofrojmë fleksibilitet regjisorëve në përfundimin e filmave të tyre, pa i ndëshkuar për diçka që është jashtë kontrollit të secilit”, tha presidenti i Akademisë, David Rubin dhe shefja ekzekutive, Dawn Hudson.
Kjo është hera e katërt, në historinë 93-vjeçare të ndarjes së këtyre çmimeve, që data e ceremonisë është ndryshuar.
Tre rastet e mëparshme janë regjistruar më:
- vitin 1938, për shkak të vërshimeve në Los Angeles.
- vitin 1968, për shkak të vrasjes së liderit për të drejtat civile, Martin Luther King Jr.
- vitin 1981, pas tentim-vrasjes së presidentit të atëhershëm amerikan, Ronald Regan.
