Pritet të shtohen masat ndëshkuese për veprën penale “falsifikim monedhash”.
Zv.ministri i Brendshëm, Julian Hodaj theksoi se pavarësisht faktit që Shqipëria nuk është vend prodhimi i monedhave të falsifikuara, duhen marrë masa për të parandaluar këtë fenomen.
Kodi Penal pritet të pësojë ndryshime me qëllim ashpërsimin e dënimeve për veprën penale. Këto ndryshime janë propozuar nga Prokuroria e Përgjithshme.
“Është një sugjerim vetëm i Prokurorisë së Përgjithshme. Ne po e marrim në konsideratë shumë seriozisht dhe me projektin e ndryshimeve të reja që mund të paraqiten për kodin penal do të shikohet edhe mundësia e paraqitjes së një dispozite specifike”, deklaroi Hodaj.
Për këtë vepër penale, ligji aktual parashikon deri në 5 vite burg, ndërsa kur kryhet më shumë se një herë apo bashkëpunim, deri në 15 vite.
Sipas zv.ministrit, më së shumti monedha të falsifikuara vijnë nga jashtë vendit.
