Një kryetar komune që u zgjodh me shorteun “kokë a pil”. Kështu u zgjodh kreu i komunës në një qytezë të izoluar në Peru. Bëhet fjalë për qytezën e Tibillos, ku dy kandidatët dolën me vota të barabarta.
Por, fati ishte në anën e Wilbert Estrada, i partisë së qendrës “Nisma Popullore”.
“Falënderoj Virgjëreshën e Shenjtë të qytezës sime. Sot më ka buzëqeshur fati. Jam shumë i lumtur për të punuar e për të çuar përpara këtë qytezë të harruar”, deklaroi fituesi për median, raporton atsh.
Estrada u shpall fitues përballë kushëririt të tij, Javier Gallegos të Lëvizjes “Rajonale të Punës për Modernizim”.
Secili prej tyre mundi të marrë 102 vota nga një total prej 347 vota të mbledhura në zgjedhjet lokale të 7 tetorit. Dy kandidatët e tjerë mundën të fitojnë pjesën e mbetur të votave.
Kjo zgjedhje e pazakontë u zhvillua në publik, në ambientet e Komisionit Special Zgjedhor të rajonit Ica. Monedha u hodh nga komisari i policisë së qytezës.
